ملف سري ومكتوم

ملف سري ومكتوم

بقلم: عمر عبدالله
عندما أكون عيناً على الشعبِ.
دولة رئيس الوزراء الأكرم..
كل عام وأنتم بألف الف خير وسعادة، وأعانكم الله على هذا الشعب، الذي لايثمًِن جهودكم، ولايَثْمِن معه معروف..
يادولة الرئيس..
سأكتب لك بالعامية، واللهجة البدوية الطفيلية، لأنني اعلم علم اليقين إن حكومتكم مابتحب المدنية والتحضر المزيَّف، عكس مايقوله عنكم هذا الشعب الجاحد للنعمة.
يادولة الرئيس..
كل الشعب سيء وناكر للجميل ولايفقه في السياسة الا تشكيل المجالس القروية، ولايعلم في الاقتصاد الا كوبونات السكر والرز، انا الوحيد يادولة الرئيس الذي افهم كل شيء، افهم في السياسة والصفقات، افهم في الاقتصاد والمنصات وصناديق الدعم، افهم في التربية والملاهي، افهم في التعليم عن بُعد، بَعد ان جربته عن قرب وعلى استحياء، افهم في السياحة وخصوصا السياحة الداخلية في البحر الميت برفقة اطفال بلادي..
يادولة الرئيس..
لقد خَصَّني الله بالدفاع عنكم وجعلني عينا لكم، وليس ذنبا او جاسوسا، ولذلك سأخبركم من باب الود والتواضع وليس من باب الند والوضيعة.. نعم سأخبركم عما يقوله هذا الشعب عن حكومتكم، ليس هذا فحسب يادولة الرئيس، بل سأخبرك كيف كنت ادافع عنكم بصفتي مواطن اقسمت بالله على سبعة كتب سماوية، ان اكون عبدا مطيعا مهذبا وان احافظ على المستور..
دولة الرئيس..
خذ كلامي بكل اريحية، ولاتتاثر مما سأخبركم به من اقوال لهذا الشعب، فانا الجمتهم بلجام من حديد، مهو انت عارفهم اكثر مني، إذا كمامة الجمتهم فما بالك بلجام الحديد!
يادولة الرئيس..
الشعب بقول انه مافيه كورونا وانكم بتتخوثوا عليهم، شوف هالحكي كيف؟ هو اصلا انت فاضي تتخوث عليهم؟
المهم انا ماسكتت الهم، وفهمتهم ان كورونا مرض خطير جدا واخطر من الفساد، شو الفساد يارجل؟
يسعد دين الفساد، اصلا الفساد مرض غير معدٍ.. عمرك يادولة الرئيس سمعت إن الفساد انتقل بالملامسة لرغيف الخبز؟ طبعا لا.. أما كورونا ياملعون أبو اصحابه بصيب الحلِق والرئة والدعم والخبز، يعني يادولة الرئيس باختصار الشعب غبي.. كل اللي صار فيهم من كورونا وبعدهم بقولوا مافيه اشي اسمه كورونا.. الشعب اهبل بفكر كورونا فيروس وبس، مابعرفوا ان كورونا يتكاثر على شكل اوامر دفاع ومنصَّات ومحافظ الكترونية وضمان وسلب ونهب.. ول على هيك شعب.
المهم يادولة الرئيس اقنعتهم الك وقَلَّعتهم..
يادولة الرئيس..
الشعب بقول ان الحكومة لهطت القروش اللي في صندوق العشيرة، عشيرة همة وطن..
والله اشي بخزي، معقول تفكر حكومتنا بلهط قروش الصندوق، اللي والله العظيم ماوصلن مليار.. حكومتنا نظرتها اكبر من هيك، وبعدين القروش اذا كانوا اقل من مليار بكونوا وسخ ادين والله، والحكومة الله مِنعِم عليها ومفضِّل، عندها ثلاثة مليار حلال زلال، ولا ابن كلب بقدر يسألها وين راحوا، لانه هاي امور شخصية عيب الواحد يسأل عنها، بس ويش اقول للمواطن اللي بطل يستحي على حاله، وصار يسأل عن كل صغيرة وكبيرة..
انا معكم يادولة الرئيس وعارف قروش الصندوق وين راحوا.. وزعتوهم على عمال المياومة، الله يوخذهم ويريحنا منهم، واشتريتوا لينا فيهن كمامات، ودفعتم اجار الفحص للفيروس، تحت شعار (اوعدينا تفحصي)..
يادولة الرئيس..
سمعت مواطن ماعنده وطنية ولاذرة رجولة، سمعته بدعي عليك لانك اخذت منه دعم الخبز، مابعرف ان الاعمال ترفع الى الله كل اثنين وخميس، يعني يومين في الاسبوع، وانتم رفعتم دعم الخبز بس مرة وحدة..
شو يعني رفعتم دعم الخبز عالفقراء؟
يعني اذا الواحد مابوكل خبز بموت؟
اقسم بالله بعرف مسؤولين مابوكلوا خبز، قضوا حياتهم بوكلوا كعك وبسكوت وسنيكرز وهيهم عايشين وربنا اعطاهم..
يعني ضروري المواطن يوكل لحم حلال مابكفي انه ابن حلال؟ هي المسؤولين بوكلوا نواشف ولاعمرهم ذاقوا لحم الحلال الا في العزايم..
يادولة الرئيس..
بيني وبينك ومابدي تزعل، اقسم بالله مابكذب عليك، يلعن الكذاب حتى لو كان وزير..
الناس يادولتك بقولوا: انك بتحط وزراء ورؤساء هيئات من الناس المخالطين الك، وحتى صارلك فترة بتحط من مخالطي المخالطين..
طبعا انا مش مقتنع وبعرف ان الشعب حسود.
أنا اقنعتهم ان هذا الكلام مستحيل يعمله واحد صاحي قبل الساعة اربعة العصر، قلتلهم كيف حط وزراء من المخالطين وهو لما اختار الوزراء ماكان كورونا موجود وماكان فيه اشي اسمه مخالطة؟
فعلا اقنعتهم وافحمتهم لأن الشعب بيعرف ان المخالطة فقط للمصابين ومابعرف ان المخالطة للحبايب والنسايب.. فعلا شعب غبي.
يادولة الرئيس..
أمي بتقول عنك ليش خاصم عليها عشرين نيرة من راتبها الضمان البالغ تسعين وتكة..
طبعا الحجة اقنعتها على طول ودخلت ليها من مدخل الدين والايمان..
قلت ليها: ياحجة الله يطول عمرك، ماظل من العمر قد ماراح..
والرسول بقول اعمار امتي مابين الستين والسبعين، وانت راتبك تسعين، ودولته اخذ منه عشرين حتى يصير رواتب الشعب كاعمارهم مابين الستين والسبعين..
طبعا الحجة اقتنعت وللامانة دعتلك كثير اقسم بالله، كنت شايفها رافعة اديها بتناجي ربها، ولما خلصت دعاء سالَتني عن عمرك قلتلها: في الستين قالت: هاظا مطول!! ورجعت تدعي مرة ثانية، انا ماسمعتها بس حاسها بتدعيلك بالخير هيك احساسي.
يادولة الرئيس..
فيه ختيارة والله يقطع الختياريات، شفتها قبل ايام، اول مانزل المعاش واقفة على باب بنك الاسكان وكان جرار الباب بفتح من تحت لفوق بعيد عنك، يعني اقل من متر فاتحينه.. وهذه الختيارة دنقت يعني طأطأت رأسها ودخلت البنك وسمعتها بتقول ول عليهم ذلونا ذل عشان اكمن نيرة..
انا اقسم بالله تألمت وزعلت، ولولا اني خفت، الا اسوي رقصة على باب البنك..
طبعا مازعلت مشان الختيارة، او الذل اللي شعرت فيه هاي الختيارة، والهوان اللي اوصلها الى ارذل العمل، والبين اللي لطَّم خدودها.. كيف ازعل مشانها؟ الله يقطعها ويقطع كل الختياريات في البلد بجاه ربنا ومايظل ولا ختيار ولا ختيارة الا اللي داخل مجلس الاعيان..
انا زعلت لانها بتتهمك انك اوصلتها لمرحلة العبودية مشان شوية قروش،
طبعا كعادتي كمواطن صالح رحت الها وقلت ليها ليش بتنكري المعروف ياحجة يامخرفنة؟
الهدف من دخولك مطأطأة الرأس هدف ديني بحت حتى تتعلمي كيفية الركوع في الصلاة واذا ربنا طول بعمرك راح نعلمك السجود كمان.. هاي سياسة الحكومة من زمان.. بصراحة الختيارة انبسطت وشكرتني كثير لاني صادق معها واستلَمت راتبها، وصار معها مثل ماصار مع امي، وصارت تدعي ومن شدة الخشوع والركوع تبكي..
يادولة الرئيس..
فيه ناس من الشعب فتان بحب يفتن.. بقولوا انك متهاوش ومتطاقر (بعني ملاسنة) مع زميلك في العمل وزير الصحة، وبقولوا انت بدك ترفع الحظر كامل وترجع الحياة مثل ماكانت قبل كورونا حسب قاعدة ارخميدس (ريت لاقام حمار بشدُّه، ولاطلعت من وراهم شمس) وبقولوا انك بدك تكسب شعبيات على ظهور المواطنين، وان وزير الصحة عارَض كلامك، ول عليه، وبده يخنقنا في سبيل يطلع في كلامه راس، ويقنع الناس انه بَطَل كورونا وانه وزير كورونا، وبطمح يصير رئيس وزراء بدالك، وانه مصدق حاله بعد هالغزل اللي جاه اول اسبوع من كورونا..
والناس بقولوا كمان ان الهوشة صحيح وان الوزير مشَّى كلامه عليك، وعمل حظر العيد خاوه ولذلك جاء الاعلان مفاجئ..
وبقولوا انك كنت بدك ترجعنا للحياة الطبيعية الاولى على اساس انه كان فيه حياة..
انا يادولة الرئيس دافعت عنك حتى اني اضطريت اكذب كذبة بيضاء عالوزير، مشان اخليك انت سوبر ماركت قصدي سوبر مان المرحلة..
قلتلهم اصلا رئيس الوزراء مابدور شعبات عند المواطنين لانه مستواه اكبر من هيك وبعدين الشعب الاردني بخيل، ومستحيل يعطي دولتك شعبيات، شعب وانا عارفه لاتأمن اله.. والله لو تنزل رئيس بلدية مابنجحوك، لانهم عارفينك منيح وبغاروا منك ومابحبوا الزلمة الزين..
وحكيتلهم كمان هذا الوزير تبع كورونا بزعل من دولتك لانك زمان رجَّعت فني المختبر فراج الى مكان عمله بعد مانقله الوزير نقل تعسفي من الاغوار الشمالية الى شرق البلاد..
بالمناسبة دولتك متى بدك تعين لينا وزير صحة بعد ماصار جابر وزير كورونا؟ مش مستعجلين على مهلك اصلا الشعب صار مريض نفسي ومش بحاجة لطبيب. انا عارف علاجه.. بس خلي واحد يغمز ليه بعينه وهو بطبل على طول..
دولة الرئيس..
شعب بِضَحِّك، بقول انك فتحت المولات والبارات والملاهي والمحلات التجارية وسكرت بيوت الله، وناقمين عليك وبدعوا عليك ليل نهار..
طبعا شعب عاطفي مابعرف مصلحته، انا مع اغلاق المساجد للأبد لان الدين في القلب يادولة الرئيس، وبعدين الفيروس جاء من الصين وهذه دولة كافرة وفيروسها كافر بعيد عنكم ويستهدف الاسلام ودور العبادة.. انا بصراحة خايف الفيروس يفوت المسجد ومايطلع ويلزق فيه، مثل اليهود اللي لزقوا في فلسطين.. وبعدين نصير نطالب بحق العودة للمساجد.. والله ثقيله علينا..
ثم يادولة الرئيس اوصيكم بمنع الحج لهذا العام لان الشعب حقود وماله امان، بتخاف يروح على مكة ويطلعلك واحد مو وطني ويصير يدعي عليك عند ستار الكعبة وبتخاف تكون باب السماء مفتوحة وربنا يستجيب الدعاء، لذلك اخوي بلاحجة وبلا عمرة وبلاها الصلاة، حتى مرة سمعت ان واحد مات ودخل الجنة ولم يسجد لله سجدة واحدة..
اما اللي بقولوا ان فتح البارات والملاهي خطأ، خوفا من نقل الفيروس، فهذول كلامهم مردود عليهم، اصلا فيروس كورونا لونه تبع هيك شغلات كان ظل في بلاده اللي كلها ملاهي، لذلك كورونا ماله مصلحة يفوت عندنا عالملاهي والبارات، فهو كورونا ١٩ والفيروس لما يكبر بيعقل..
اسألك بالله ولا اسألك عن فعايلك قصدي ذنوبك.. عمرك حسيت او سمعت او حتى قال ليك وزير الصحة ان فيه واحد خالط رقاصة في الملهى الليلي وصار معه كورونا؟
اصلا المخالطة في الملهى الليلة بطول العمر.. الله لايطول عمر الشعب حتى نرتاح ومايظل عندنا ولاعاطل عن العمل ولاعمال مياومة ولامتضررين ولاغارمين، يارب كلهم يموتوا ومايظل الا عمال الوطن وبس، حتى اذا مات مسؤول في حكومتكم لاسمح الله يدفنوه بطريقتهم.
يادولة الرئيس..
شفت ليك واحد كاتب عالفيس بوك ان الصحافة والاعلام والتلفزيون الاردني كلهم ابواق مأجورة للحكومة، خصوصا اللي بسموا حالهم صحفيين عندنا..
طبعا انا رديت عليه رد بزلزل..
حكيتله ياكذاب (طبعا الكذاب اللي كتب عالفيس لاتفكرني بقصد الحكومة) سد بوقك، اصلا الحكومة مابتستأجر اقلام ماجورة، عندها اقلام كثير، ومش بحاجة لأي قلم، وحذفت صداقته وعملتله حظر تجول من صفحتي من الثامنة الظهر حتى الساعة التاسعة الا نصف فجرا..
يادولة الرئيس..
الشعب بقول والله الا تشوفوا عجيبات العجب بس يخلص كورونا والا يفضحوكم ويطيروك انت تحديدا.. لذلك عليك الانتباه واتباع التعليمات التالية:
حاول تعتقل اكبر عدد ممكن من هذول الاشخاص وانا مستعد ازودك فيهم واحد واحد والراس بدينار..
حاول تخلي الانتخابات هذا الصيف، حتى ينشغلوا في بيع الاصوات والوعود الهاملة مثلهم بعيد عن السامعين، والطفران يقبض حتى يعوض الخصم اللي اجاه بسبب كورونا، وهيك بينسوا اللي صار فيهم.
لاتجيب ليهم سيرة عنق الزجاجة اللي ورطك فيها الملقي، واذا ولابد قول قارورة، لان الشعب بحب القوارير من ايام مسلسل جن واخونا شادي الذي ابهر الجميع بأدائه المميز، حتى طِيران (جمع طور يادولة الرئيس) البتراء اصبحت مميزة وتتطهر من الجنابة كل يوم وحين.
عفكرة دولة الرئيس، انا المواطن اللي عملت لعيونكم هاشتاق اسمه #حكومة_الجن ، ترويجا لحكومتكم الموقرة، ونكاية بالشعب الجاحد، الذي هرم وفقد طاقته..
يادولة الرئيس..
الشعب بيسأل شو قدموا المسؤولين والوزراء والنواب والرأسماليين والاقطاعيين؟.
طبعا انا جاوبتهم باختصار والله على ما اقول شهيد، ان هؤلاء قدموا مالا يقدمه اي مواطن في هذا الوطن..
لقد قدموا الذهب وبعضهم الفضة، على اساس ان الكلام من فضة والسكوت من ذهب..
لقد قدموا اثمن مالديهم.. وهل هنالك ماهو اثمن من الكرامة؟
يكفي انهم قدموا صمتهم، وضهروا امام العالم الخارجي بقمة الادب، ولم يكونوا ثرثارين مثل الشعب..
اما ماديا فلم يدفعوا فلسا واحدا، حتى ماتفوت عيونهم في الدولة ويحرجوها، ونعم التربية والله.
يادولة الرئيس..
واحد بعرفه عز المعرفة واذا بدك بعلمك عنه عالخاص سمعته بقول لجماعة واقف معهم، وبطلق من نسوانه الثنتين ان الحكومة مش دارية اذا فيه شعب وانها حكومة شاردة (يعني صار ماصار بتشردوا برا.. كلامه بوجع ول عليه)، وان الحكومة لاتمت لهذا الوطن بصله..
طبعا انا فورا اخذته في سيارتي الكيا وطلعته في الكرسي الخلفي حتى يختنق من ريحة الدخنة، ورحت فيه عالمفتي حتى يقطع فتوى لانه طلَّق ووجب عليه الفتوى..
وبعد ماقطع الفتوى حكيتله بدي اسألك سؤال..
انت اخر الشهر بتنسى راتبك؟
قالي بنسى روحي ولا بنساه..
حكيتله: طيب كيف بتحكي ان الحكومة ناسية الشعب مصدر النيرات قصدي مصدر السَّلَطات والسُّلطات..
فعلا الرجل اعترف انه غلطان، وطلق من نسوانه مرة ثانية، ان الحكومة مو ناسية الشعب وانها حكومة مخلصة..
وسالني: اذا بلزم يقطع فتوى ثانية؟
حكيتله مابدها فتوى فقد انتظر العدَّة وطلِّق النسوان وتزوج الضمان واعملك منصة، والحكومة بتدعمك.
يادولة الرئيس..
بقولوا انك مخوِّف الاعيان، وطالب منهم يوصوا برفع اسعار المحروقات..
طبعا كلام مش داخل مخي للاسباب التالية..
انت مستحيل تخوفهم، واخلاقك لاتسمح لك بذلك، لان الواحد منهم من جيل جدك الله يرحمه ويخلد عظامه في جنات النعيم.
بعدين لو بدك تخوفهم بتخلي غيرك يخوفهم، حتى لو صار ماصار بقولوا نَطَّة جاهل الله يلعن الشيطان.. اكيد فاهم علي كويس.
بعدين الاعيان اسمهم اعيان من الفعل الثلاثي المجرد من كل وطنية (عين)، وقد اوصوا الوصية الواجبة برفع الاسعار لاعتبارات دينية واخلاقية..
دولة الرئيس..
بحكم علاقتي القوية مع مخاطي مخالطي اصحاب المخالطين بقولوا: انكم بتخبصوا في قراراتكم، عملتوا حظر على الطلاب القادمين من مصر وتركتم سواقين الشاحنات والتريلات بدون حظر حتى خليتوا البلد معميسية..
طبعا شعب مابصدق وهو قاضب عليكم مقضب، تقول انتم ضرة امهم..
طبعا الشعب مابعرف سياستكم الحكيمة، بفكر السالفة فزعة..
بس انا ماسكتت وحياة قلبك ووقَّفتهم عند حدهم وقلت ليهم الطلاب هذول لازم نحجر عليهم لان اغلبهم بيقروا طب وبروحوا المستشفيات هناك، ويمكن يكونوا معهم فايروس كورونا من عند اخوانا الفراعنة.. اما السواقين صعب يصيبهم الفيروس لان ريحتهم كلها ديزل وفوسفات ودخان وزيت محروق..
وكمان ازيدك من الشعر بيت، سواقين التريلات ماناس بخالطهم من الشحبار والسخام والشحمة اللي عليهم، ولباسهم اللي اسود اسود، يارجل بيني وبينك نسوانهم والله مابخالطنهم.. ولذلك مافي داعي نحجر عليهم ونقيد حريتهم ونحبسهم، لانه بقولوا فيه حُرمَة زمان حبست بسة (يعني قطة اليفة زي اللي بنشوفهن عالتلفويون في برنامج يخرب بيتك) وربنا حطها في النار لانها حبستها بس مو في البحر الميت، كيف بالله عليك ربنا بده يسوي فيكوا لو لاسمح الله سجنتوا سايق تريلا من العيار الثقيل (٦ سلندر).
دولة الرئيس..
سمعت الناس في الشارع بتقول ان التصاريح للحبايب والنسايب ومن تحت الغطاء، طبعا هذول الناس مو صادقين، مين هم اصلا الحبايب اللي بدكم تعطوهم تصاريح؟
كل حبايبك وزراء ورؤساء هيئات مستقلة مش بحاجة تصاريح، وغير هيك، ماليكم حبايب الا جيبتكم، وعمرك شفت واحد بجيب تصريح لجيبته؟ حسبي الله على هيك شعب.
يادولة الرئيس..
فيه وحدة سمعتها بتقول لامها ان الحكومة كذابة واستعراضية وبتحب العرط، لانكم في بداية الازمة حطيتوا الناس في فنادق خمس نجوم ودللتوهم عالاخر وان هذول الفنادق للناس الواصلين والمدعومين..
لاتهتم دولتك، اصلا هذول الشعب مش وجه نعمة ومابستاهلوا الدلال، حتى الفنادق وين المشكلة لو كانوا لمتنفذين؟ اصلا المتنفذ منا وفينا ومن عظام الرقبة واذا تتبعنا اصله بنلاقيه مواطن يعني زيي هيك..
حتى القروش اللي بتوخذوهم من المحجور عليهم هذا اشي طبيعي وفيه تهذيب لنفس المواطن وبتخليه يشعر بالزهد..
شو بده المواطن احسن من انه صار يدور عالموت ومايلاقيه والله، لاننا في ظل حكومتكم صعب نلاقي الموت ياحياتي..
دولة الرئيس..
خذلك هالخبرية:
الطفايلة بعدهم بذكروك في التمر اللي وزعته في رمضان السنة الماضية، ول عليهم مابنسوا شيء، وبقولوا انك وزعت مالا تملك لمن لايستحق، يعني خلوك مثل بريطانيا التي اعطت فلسطين دون ان تملكها لليهود الذين لايستحقونها..
ولهيك الطفايلة بقولوا ان التمر والمية اللي وزعتهم هذول من مال الشعب مو من راتبك، وبدهم حصتهم اللي اعطيتها لاغنياء عمان وتركت فقراء الطفيلة..
طبعا ان حلفت يمين اني شفتك لما اشتريت التمرات من دكان الحج سفوح، ودفعت حقهم من جيبتك، وبعدين لاتصدق ان الطفيلة فيها فقراء..
هو اللي عنده سمن ولبن ورابط ثلاث حمير على باب الدار فقير؟
هو اللي لابس عباية حمراء وبروح عالمسؤولين وبطمنهم عني وعن اشكالي فقير؟
هو اللي عنده سيارة كيا منتهي ترخيصها من سبع سنين بس فقير؟
لاتصدقهم ياغالي بل اضربهم بيد من حديد..
دولة الرئيس..
حتى لو كل الشعب قال عن حكومتكم انها حكومة جباية وخيانة وفساد وقمع، لاترد عليهم، مو ضروري اذا كل الشعب قال هيك انه صادق وحكومتكم كذابة لاسمح الله..
قوم سيدنا ابراهيم كلهم كانوا على خطأ وسيدنا ابراهيم بس اللي كان على صواب..
وكذلك قوم لوط كانوا على خطأ وسيدنا لوط الوحيد اللي كان على صواب، وماعبَّرهم ولا تجاوب مع مطالبهم ولافتح ليهم خمارات ولابارات ولاملاهي ليلية..
دولة الرئيس..
اجماع الناس على شيء لايحلَّه..
واقصد بذلك اجماع الشعب على ضرورة مواجهة ومكافحة الفساد، لايعني انك ترد عليهم..
شو فساد ومافساد؟
الفساد عندنا ضرب من الخيال، وبعدين على راي المثل اللي بقول: الضايع في المسقاة..
يعني هم الفاسدين غريبين؟
طبعا لا.. هؤلاء ابناءنا واخوتنا وحبايبنا، يعني نذبحهم ونجيب فاسد من برا البلد؟
دولة الرئيس..
الناس الذين ذبحهم العفن وقتلتهم الرطوبة في ديوان الخدمة المدنية بقولوا ان حكومتكم اوقفت التعيينات لهذا العام، وهيك بصير عمرهم قد وصل (٤٨) سنة ومابتعينوا، حتى البنات اللي بنتظرن دورهن في ديوان الخدمة حتى يتعينن ويتزوجن ويدعسن على ازواجهن في رواتبهن صارن يطخن عالحكومة وبقولن فاتهن القطار..
بس انا عملت لهذه الفئة محاضرة مطنطنة قلت فيها:
الله لايوفقكم..
اللي صار عمره ٤٨ سنة عيب عليه يطالب بالتعيين.. شو بدها تستفيد منه الدولة؟ احمدوا ربكم اللي الدولة ماطختكم مثل خيل الانجليز..
وبعدين اللي فاتها قطار الزواج لاتهكل هم بأمكانها تلحقه في الباص السريع، واذا القضية قضية خلفة وانجاب، هاي محلولة، باستطاعة الحكومة ان تمدد سن اليأس للمرأة الى سبعين بدلا من خمسين مثل مامددت لاعضاء هيئات التدريس في الجامعات.. يعني بتصير المرأة تنجب حتى عمر سبعين واذا مشتركة بالضمان يمكن الله يرزقها عالتسعين..
دولة الرئيس..
سمعت فيه ناس بتقول إشيء..
ولاخلاص بلاش اقول.. الله يلعن الشيطان.. هسا بصيروا يقولوا عني نقال كلام زي ام زكي في باب الحارة..
خليها في القلب تجرح، لاني بصراحة ماعرفت كيف ادافع عن حكومتكم..

نبذة عن الكاتب

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: